កណ្ដាល៖ នាយករដ្ឋមន្ត្រី ហ៊ុន ម៉ាណែត ថាការ តែងតាំងរដ្ឋលេខាធិការ អនុរដ្ឋលេខាធិការ និងទីប្រឹក្សាក្រសួងស្ថាប័ននៃរដ្ឋាភិបាលអាណត្តិទី៧ នេះគឺជាការចាំបាច់ និងជាគុណធម៌នៃការដឹកនាំ។

ថ្លែងនៅក្នុងវេទិកាសាធារណៈជួបជាមួយនឹងកម្មករជិត ២ម៉ឺននាក់នៅក្នុងក្រុងតាខ្មៅ ខេត្តកណ្ដាល ព្រឹកថ្ងៃទី០១ ខែកញ្ញា ឆ្នាំ២០២៣ លោក ហ៊ុន ម៉ាណែត បានលើកឡើងថាការបន្តតែងតាំងថ្នាក់ដឹកនាំក្រសួងស្ថាប័ននានារួមទាំងទីប្រឹក្សាផងនោះ គឺជាការតម្រូវនូវការចាំបាច់ដោយសារតែពួកគេមានគុណសម្បត្តិ និងមានជំនាញក្នុងការចូលរួមជួយទៅដល់ស្ថាប័ននីមួយៗនោះ។

លោកបន្ថែមថា៖ «បក្សប្រជាជនកម្ពុជាមិនមានទម្លាប់ឡើងលើទូកដុតស្ពានចោលនោះទេ»។

ជាមួយគ្នានេះលោកបានដាស់តឿនក្រើនរំលឹកដល់បណ្ដាលរដ្ឋមន្ត្រីតាមក្រសួងស្ថាប័នការរៀបចំមន្ត្រីថ្មីគឺត្រូវធ្វើដើម្បីពង្រឹងស្ថាប័នរួមជាមួយនឹងការរក្សាសាមគ្គីភាពផ្ទៃក្នុង។

បើតាមលោក ហ៊ុន ម៉ាណែត ការតែងតាំងគឺត្រូវផ្ដោតលើ គុណសម្បត្តិ សមត្ថភាព និងអតីតភាពការងាររបស់មន្ត្រី៕